UFANISI UWAZI NA UWAJIBIKAJI NYENZO MUHIMU ZA UBORESHAJI HUDUMA-NYIMBI - MTAA KWA MTAA BLOG

HABARI MPYA

Home Top Ad

Post Top Ad

Wednesday, December 8, 2021

UFANISI UWAZI NA UWAJIBIKAJI NYENZO MUHIMU ZA UBORESHAJI HUDUMA-NYIMBI

Mtendaji wa Mahakama ya Rufani (T), Bw. Solanus Nyimbi akisisitiza jambo wakati wa ufunguzi wa kikao cha kuhitimisha ziara ya Watumishi wa Mahakama Kuu Zanzibar katika Vituo Jumuishi, Tanzania. Na Mary Gwera, Mahakama

MTENDAJI wa Mahakama ya Rufani (T), Bw. Solanus Nyimbi amewashauri Watumishi wa Mahakama Kuu Zanzibar kuzingatia mambo muhimu matatu ambayo ni Ufanisi, Uwazi na Uwajibikaji ili azma ya uboreshaji wa huduma za Mahakama iweze kufanikiwa kwa ufasaha.

Akizungumza na Watumishi wa Mahakama Kuu Zanzibar leo tarehe 08 Desemba, 2021 katika Ofisi ya Uboreshaji wa Huduma za Mahakama (JDU) jijini Dar es Salaam, Bw. Nyimbi ambaye alimwakilisha Mtendaji Mkuu wa Mahakama ya Tanzania, Prof. Elisante Ole Gabriel alisema kuwa ili kubadili mtazamo na fikra hasi za watu dhidi ya Mhimili wa Mahakama ni vyema kwanza kutengeneza mazingira mazuri ya kutolea haki.

“Nyote mnafahamu kuwa Mahakama ya Tanzania, ipo katika marekebisho/uboreshaji mkubwa ya miundombinu na uendeshaji, yote ikiwa ni katika azma ya kutoa huduma bora na kwa wakati kwa wateja wanaofika mahakamani. Pia dhamira yetu ni kujenga Imani zaidi kwa wananchi, kuhakikisha ushirikishwaji wa wadau katika shughuli za Mahakama na kutoa haki kwa haraka na wakati,” alisema Mtendaji huyo.

Bw. Nyimbi aliyasema hayo alipokuwa akifungua kikao cha kuhitimisha ziara ya Watumishi wa Mahakama Kuu Zanzibar katika Vituo vya Mahakama Jumuishi, Tanzania.

Mtendaji huyo aliongeza kwa kutoa rai kwa Watumishi hao kuyafanyia kazi mazuri yote waliojifunza katika kipindi cha ziara yao na kuwaomba kuweka bayana yale yote mazuri waliyoyaona kwa kueleza kitu gani kiboreshwe zaidi ili kuboresha hali ya utendaji kazi na utoaji wa huduma katika Mahakama nchini.

“Ninayo imani kubwa kwamba, yote mliyojionea na kujifunza mtayawasilisha kwa viongozi wenu wa Mahakama Zanzibar ili kuendelezea mazuri mliyojionea lakini mabaya mliyojionea myaache huku huku ila yawafundishe kule kwenu msiyafanye,” alieleza Bw. Nyimbi.

Kwa upande wake, Kaimu Mkuu wa Kitengo cha Maboresho ya Mahakama (JDU), Mhe. Sekela Mwaiseje alisema kuwa katika kipindi cha ziara yao, Watumishi hao walipata fursa ya kuhudhuria mafunzo ya Uendeshaji wa Vituo Jumuishi katika Vituo vya Kinondoni na Temeke ambapo kupitia mafunzo hayo walijifunza historia ya uboreshaji wa huduma za Mahakama, maadili, uendeshaji wa Vituo Jumuishi, usimamizi wa mashauri kwa kutumia mfumo wa kuratibu mashauri kwa njia ya Kielektroniki (JSDS II), matumizi ya TEHAMA na Uongozi.

Akiwasilisha taarifa ya ziara ya Mahakama Kuu Zanzibar, mmoja wa Watumishi hao ambaye ni Afisa Takwimu, Bw. Abdulrahman Makame alisema kuwa wamejifunza mambo mengi kupitia ziara hiyo ikiwa ni pamoja na huduma nzuri kwa wateja ‘customer care’, matumizi ya TEHAMA, Utunzaji bora wa kumbukumbu, ufanyaji kazi katika vituo jumuishi.

Mnamo tarehe 07, Novemba 2021 Mahakama ya Tanzania ilipokea ujumbe wa Watumishi 20 wa Mahakama ya Tanzania Zanzibar wa kada mbalimbali wakiongozwa na Mhe. Valentina Katema, Naibu Mrajisi wa Mahakama Kuu ya Tanzania Zanzibar, lengo la ujumbe huo lilikuwa ni kujifunza namna bora ya uendeshaji wa Vituo Jumuishi vilivyoanza kutoa huduma hivi karibuni.
 Mtendaji wa Mahakama ya Rufani (T), Bw. Solanus Nyimbi akizungumza na Watumishi wa Mahakama Kuu Zanzibar na baadhi ya Watumishi wa Mahakama ya Tanzania wakati wa ufunguzi wa kikao cha kuhitimisha ziara ya Watumishi wa Mahakama Kuu Zanzibar katika Vituo Jumuishi, Tanzania. Kikao hicho kimefanyika leo tarehe 08.12.2021 katika Ofisi ya Ofisi ya Uboreshaji wa Huduma za Mahakama (JDU) jijini Dar es Salaam.
Sehemu ya Watumishi wa Mahakama Kuu Zanzibar wakifurahia jambo wakati wa ufunguzi wa kikao cha kuhitimisha ziara ya Watumishi wa Mahakama Kuu Zanzibar katika Vituo Jumuishi, Tanzania.
Kaimu Mkuu wa Kitengo cha Maboresho ya Mahakama (JDU), Mhe. Sekela Mwaiseje wakati wa ufunguzi wa kikao cha kuhitimisha ziara ya Watumishi wa Mahakama Kuu Zanzibar katika Vituo Jumuishi, Tanzania.
Sehemu ya Watumishi wa Mahakama ya Tanzania walioshiriki katika kikao cha kuhitimisha ziara ya Watumishi wa Mahakama Kuu Zanzibar katika Vituo Jumuishi, Tanzania wakimsikiliza Mtendaji wa Mahakama ya Rufani (aliyesimama mbele) aliyekuwa mgeni rasmi wa ufunguzi wa kikao hicho.
Mkurugenzi Msaidizi wa Mafunzo-Mahakama ya Tanzania, Bi. Patricia Ngungulu akizungumza jambo wakati wa kikao hicho.
Mtendaji wa Mahakama ya Rufani (T), Bw. Solanus Nyimbi (aliyeketi katikati) akiwa katika picha ya pamoja na Watumishi wa Mahakama Kuu Zanzibar pamoja na baadhi ya Watumishi wa Mahakama ya Tanzania. Aliyeketi kushoto ni Naibu Mrajisi wa Mahakama Kuu Zanzibar, Bi. na aliyeketi kulia ni Mkurugenzi Msaidizi wa Mafunzo-Mahakama ya Tanzania, Bi. Patricia Ngungulu
Mtendaji wa Mahakama ya Rufani (T), Bw. Solanus Nyimbi akiwaonyesha kitu baadhi ya Watumishi wa Mahakama Kuu Zanzibar.
(Picha na Mary Gwera, Mahakama)

No comments:

Post a Comment

Post Bottom Ad