Maonesho ya Mvinyo wa Afrika Kusini Yaangazia Ukuaji wa Sekta ya Utalii Tanzania

 

DAR ES SALAAM

WADAU wa sekta ya ukarimu na utalii wameeleza umuhimu unaoongezeka wa vyakula, mvinyo na uzoefu wa kiutamaduni katika kuimarisha nafasi ya Tanzania kama kivutio cha utalii.

Kauli hiyo ilitolewa wakati wa hafla ya maonesho ya mvinyo wa Afrika Kusini iliyofanyika jijini Dar es Salaam, ambapo wawakilishi wa sekta hiyo walisema uzoefu wa ukarimu na burudani unazidi kuwa sababu muhimu inayowaongoza watalii kuchagua maeneo ya kutembelea na namna wanavyotumia fedha zao wanapokuwa safarini.

Meneja wa Masoko wa Afrika wa Wines of South Africa, Matome Mbatha, alisema maboresho ya miundombinu ya utalii nchini Tanzania, ukuaji wa sekta ya ukarimu na kuongezeka kwa mtindo wa maisha ya kisasa mijini vinafungua fursa zaidi za kuvutia watalii wa kimataifa.

Alisema uzoefu unaojumuisha vyakula, mvinyo, utamaduni, muziki na burudani za usiku sasa unachangia kwa kiasi kikubwa ukuaji wa utalii duniani na unaweza kuisaidia Tanzania kuongeza ushindani wake katika sekta hiyo.

Mbatha alisema taasisi hiyo imekuwa ikifanya kazi nchini Tanzania kwa kipindi cha miaka mitano iliyopita kwa kushirikiana na hoteli, migahawa, waagizaji na wasambazaji wa bidhaa ili kukuza utamaduni wa matumizi ya mvinyo pamoja na kuboresha viwango vya huduma katika sekta ya ukarimu.

Alisema sehemu ya mpango huo ni kutoa mafunzo kwa wafanyakazi wa hoteli na migahawa kuhusu uelewa wa mvinyo na huduma kwa wateja ili kuboresha uzoefu wa wageni wanapotembelea maeneo mbalimbali ya huduma.

Kwa mujibu wake, Wines of South Africa pia imeanzisha programu za mafunzo maalum na kozi za bure za mtandaoni zinazolenga kuongeza ujuzi kwa wafanyakazi wa sekta ya ukarimu pamoja na kuwajengea vijana fursa za ajira katika sekta hiyo.

Alisema Afrika Mashariki inaendelea kuwa soko muhimu la matumizi ya mvinyo, huku Tanzania ikiwa miongoni mwa masoko yanayokua kwa kasi kutokana na kuongezeka kwa shughuli za utalii na upanuzi wa huduma za kisasa za ukarimu.

Kwa upande wake, Kaimu Balozi wa Afrika Kusini nchini Tanzania, Frans van Aardt, alisema matukio ya utalii na ukarimu yanasaidia kuimarisha mahusiano ya kiutamaduni na kiuchumi kati ya nchi kupitia fursa za biashara, uwekezaji na mwingiliano wa kijamii.

Alisema ushirikiano kati ya Tanzania na Afrika Kusini unaendelea kukua katika sekta mbalimbali zikiwemo utalii, madini, benki na mawasiliano ya simu, ukiungwa mkono na maono ya pamoja ya ukuaji wa uchumi na maendeleo ya kikanda.

Tukio hilo lililofanyika katika Delta Hotels Dar es Salaam lilikuwa sehemu ya ziara ya Wines of South Africa katika Afrika Mashariki inayolenga kuwaunganisha wazalishaji wa mvinyo, wadau wa sekta ya ukarimu na watumiaji katika ukanda huo.