Waziri wa Nchi, Ofisi ya Rais Mipango na Uwekezaji, Profesa Kitila Mkumbo, akimkabidhi hati isiyo asili Mwekezaji kutoka kampuni ya Pan Tanzania Agriculture Developments Ltd, Dior Feng jijini Dar es Salaam leo Novemba 29, 2025 kwaajili ya uwekezaji wa kilimo Biashara Mkoani Lindi katika wilaya ya Kilwa kwenye vijiji Vinne vya wilaya hiyo.
Waziri wa Nchi, Ofisi ya Rais Mipango na Uwekezaji, Profesa Kitila Mkumbo, akizungumza katika hafla ya makabidhiano ya hati isiyo asili kwa kampuni ya Pan Tanzania Agriculture Developments Ltd, jijini Dar es Salaam leo, Novemba 29, 2025.
Mwekezaji kutoka kampuni ya Pan Tanzania Agriculture Developments Ltd, Dior Feng akizungumza wakati wa kamabidhiano ya hati isiyo asili kwaajili ya kuendesha mradi wa Kilimo biashara katika Vijiji vinne vya wilya ya Kilwa.
.jpeg)
Mkurugenzi Mkuu wa Mamlaka ya Uwekezaji na Maeneo Maalum ya Kiuchumi Tanzania (TISEZA), Gilead Teri akizungumza wakati wa kukabidhi hati isiyo asili kwa kampuni ya Pan Tanzania Agriculture Developments Ltd kwaajili ya kuendesha mradi wa Kilimo katika Vijiji vinne vilivyopo Wilayani Kilwa Mkoani Lindi.
Na Avila Kakingo, Michuzi Tv
SERIKALI imekabidhi hati isiyo asili (derivative title) kwa Kampuni ya Pan Tanzania Agriculture Developments Ltd kama hatua muhimu ya kuimarisha utekelezaji wa miradi ya maendeleo ya kilimo na kuongeza thamani ya ardhi inayotumika kwa shughuli za uzalishaji.
Hati hiyo wamekabidhiwa na Mamlaka ya Uwekezaji na Maeneo Maalumu ya Kiuchumi Tanzania (TISEZA)baada ya kampuni hiyo kukidhi vigezo na masharti ya kisheria yanayohusiana na matumizi ya ardhi kwa shughuli za kilimo cha kisasa na uwekezaji wa muda mrefu.
Hatua hiyo inalenga kurahisisha upatikanaji wa mikopo, bima ya uwekezaji na usalama wa umiliki ili kuongeza tija katika sekta ya kilimo.
Akizungumza katika hafla ya makabidhiano hayo jijini Dar es Salaam leo, Novemba 29, 2025 Waziri wa Nchi, Ofisi ya Rais Mipango na Uwekezaji, Profesa Kitila Mkumbo, amesema mradi huo utatumia ekari 6200 ikiwa ni sehemu ya utekelezaji wa sera za Serikali za kuvutia uwekezaji na kuendeleza Maeneo Maalumu ya Kiuchumi (SEZ) kupitia Mamlaka ya TISEZA, ikiwa ni hatua ya kuimarisha uchumi shindani na wa kisasa unaotegemea kilimo, viwanda na teknolojia.
Amesema kuwa utoaji wa hati isiyo asili unatoa uhakika wa kisheria kwa wawekezaji wanaohitaji kuendeleza miradi mikubwa ya kilimo bila kubadili umiliki mkuu wa ardhi, hususan katika maeneo yanayohitaji uwekezaji wa miundombinu na teknolojia.
Kwa Upande wa Mkurugenzi Mkuu wa Mamlaka ya Uwekezaji na Maeneo Maalum ya Kiuchumi Tanzania (TISEZA), Gilead Teri amesema kuwa mwekezaji akishindwa kutekeleza mradi kwa mujibu wa sheria za ardhi atatakiwa kurudisha ardhi hiyo kwa serikali ili apewe mwekezaji mwingine.
Pia ametoa wito kwa wadau mbalimbali kumsaidia mwekezaji ili aweze kutekeleza mradi huo kwaajili ya manufaa ya taifa.
Kwa upande wake, Mwekezaji kutoka kampuni ya Pan Tanzania Agriculture Developments Ltd, Dior Feng ameshukuru serikali kwa kuendelea kuboresha mazingira ya uwekezaji na kusisitiza kuwa hati hiyo itasaidia kuongeza uzalishaji, upatikanaji wa masoko na kuchangia pato la taifa kupitia ajira na uwekezaji endelevu.
Amesema kuwa Pan Tanzania Agriculture Developments Ltd kwa ushirikiano na EPZA wanaanzisha mradi wa kilimo biashara wenye thamani ya dola milioni 640, mradi ambao ni kati ya mikubwa zaidi kuwahi kuanzishwa nchini.
"Mradi huu utafanyika katika ekari 62,000 wilayani Kilwa na utaweka eneo hilo kwenye ramani ya kilimo cha kisasa barani Afrika."
Lengo kuu ni kuongeza uzalishaji, kuongeza thamani ya mazao, na kuinua uchumi wa wananchi wa eneo la Kilwa kwa kiwango kikubwa.
Pia ameeleza kuwa mradi huo unatarajia kuzalisha zaidi ya ajira 200,000 za moja kwa moja na zisizo za moja kwa moja katika kipindi chote cha utekelezaji wake, Wakazi wa vijiji vinne vya mradi vya Mavuji, Nainokwe, Migeregere na Liwiti, watapewa kipaumbele cha kwanza katika ajira, kuhakikisha kuwa manufaa ya mradi yanarudi moja kwa moja kwa jamii ya Kilwa.
Mwekezaji Dior ameaidi ya ekari 2,000 zinajengwa kuwa Kanda Maalum ya Usindikaji kwa Mauzo Nje (Agri-EPZ), yenye viwanda vya mazao ya mihogo, korosho, ufuta, maharagwe, soya, samaki, matunda, vifungashio, chakula cha mifugo, na bidhaa za nishati mbadala. Ekari nyingine 60,000 zitakuwa mashamba ya kisasa yatakayolisha viwanda hivyo na upandaji, umwagiliaji na usimamizi wa mashamba utatumia teknolojia za kisasa kama droni, GPS na sensa za IoT.
Kwa upande wa maendeleo ya mradi Mwekezaji amesema mradi huo utajenga miundombinu muhimu ikiwemo barabara mpya za kuunganisha maeneo ya mradi, mtandao wa maji, umeme wa gesi utakaotengenezwa ndani ya mradi, pamoja na mfumo imara wa mawasiliano.
Aidha, ujenzi wa makazi mapya, vituo vya afya, shule, maeneo ya michezo, vituo vya mafunzo na maeneo ya biashara unatarajiwa kubadilisha sura ya Kilwa na kuinua kiwango cha maisha ya wananchi kwa kiwango kikubwa.
Pia Dior amesema zaidi ya wakulima wadogo 10,000 watapata mikataba ya kilimo, mafunzo na masoko ya uhakika kupitia mradi.
Kwa upande wa Mkuu wa Wilaya ya Kilwa, Mohamed Nyundo amesema kuwa wapo tayari kupokea mradi huo kwa asilimia 100 kwani wilaya na mkoa wa Lindi upo salama kwa asilimia 100.
Amesema kuwa katika wilaya hiyo umeme ni wa uhakika pia huduma za kijamii zipo hivyo zitasaidia mwekezaji kufanikisha mradi huo kwani miundombinu ya barabara ipo na inaendelea kuboreshwa huko meli ya mizigo imeshaanza kufanya kazi katika bandari ya kilwa kwaajili ya kusafirisha mizigo kutoka Tanzania kwenda Commoro.
.jpeg)
Picha ya pamoja.
No comments:
Post a Comment