KIJIWE CHA WIKIENDI NA BRAZA JEFF MSANGI

Nikiliangalia jua naona linakaribia utosini. Hiyo ni kumaanisha kwamba saa sita imekaribia. Leo jua limewaka kweli kweli. Na kwa sababu jana mvua za rasharasha zilinyesha, basi pamekuwa na fukuto la aina yake. Labda ndio maana leo kijiweni hakuna watu wengi. 

Kawaida kijiwe hufurika siku za Jumamosi. Ah nimesahau, wikiendi ya Pasaka hii. Kuna wakati jamaa mmoja alisema wanaume wengi hatupendi kukaa nyumbani siku za Jumamosi kwani wake zetu nao huitumia siku hiyo kutupa kila aina ya kauli. 

Zipo zenye kutia matumaini lakini pia zipo ambazo huwa ni za kukera. Ukishinda nyumbani basi ujiandae. Utaelezwa kila aina ya matatizo. Ndio maana kijiwe huwa kinajaa Jumamosi. Pamoja na kwamba kijiwe leo hakijafurika, michapo kibao.

 Lakini dawa ya matatizo sio kuyakimbia. Unakabiliana nayo tu kiume. Ee bwana foleni ya mwanzo mwa wiki hii mliiona? Noma sana. Huwezi amini kutokea Sayansi mpaka St.Peters nilitumia kama masaa 3 hivi. 

Baadae kuja kuuliza ndio nikaambiwa ah si jamaa wa China yupo mjini!   Kawaida Dar siku hizi pana foleni. Ila siku hizi naona inazidi kuwa kali. Kama una miadi ya saa tano asubuhi katikati ya jiji na unaishi huku kwetu Mbezi, basi ili usije pata presha ya kuchelewa, ianze safari yako saa mbili na nusu. 

Wiki hii kwa sababu Mchina alikuwepo basi kwenye mzunguko ilibidi tuanze saa 1. Unajua watu gani huongeza foleni bila sababu? Wale wanaotanua tanua. Mie siwapendi kabisa wale. Wewe nani bwana? Ina maana wewe ndio mwenye haraka kushinda wengine wote? Hivi washkaji, kwa mfano, siku wananchi wagome kupisha msafara wa Rais hivi itakuwaje? Thubutuuu..nchi hii watu waoga sana…hamna kitu kama hicho… 

BOFYA READ MORE HAPO CHINI KUSOMA ZAIDI

  Kwanini Mchina kaja Tanzania kama nchi ya kwanza barani Afrika baada ya kutoka Urusi tu? Yaani Tanzania ilikuwa nchi yake ya pili kuifanyia ziara tangu achaguliwe kuiongoza China! Kweli? Alah, hujui? Nchi yetu ni tajiri…kadakia mwingine. Sisi wenyewe ndio wajinga. Tunaruhusu wageni waje wachume mali zetu kisha haoo wanasepa. 

Mbaya zaidi baada ya muda mfupi tunafunga safari kwenda kwenye nchi zao kuomba. Inaingia akilini? Mchina anaibaje lakini wakati tuna kila aina ya vyombo vya ulinzi na usalama? Mchina haibi. Tunaojiibia ni sisi wenyewe. Tizama jinsi tunavyopenda rushwa. Kwa hiyo mchina anakuja wenyewe tunamkabidhi malighafi. Tena tunazungukana wenyewe kwa mchina. 

Halafu mchina anaenda anatengeneza bidhaa feki feki anatuletea au tunaifuata wenyewe China kwa kisingizio cha “biashara”. Biashara gani za kuuana? Angalia jinsi ajali za nyumba kuungua moto zilivyozidi siku hizi kwa sababu ya mavitu feki feki ya umeme. 

Tumlaumu Mchina au hao wanaoitwa sijui TBS! We acha bwana. Eee bwana hivi sakata la Lwakatare limefifia kutokana na kuja kwa Mchina nini? Au ni lile tishio la maandamano ya CHADEMA? Si ulisikia CHADEMA walikuwa wanataka kuandamana siku hiyo Mchina anatia timu! Unadhani ingekuwa aibu au sawa tu? Ah, mimi haya mambo ya kwamba mgeni akija basi mnajidai mambo poa tu siyapendi. Kama mbwai mbwai tu bwana. 

Kwani? Mbona basi hawakuweza kuzuia mvua. Jamaa kaja pale nje tu ya Serena pamejaa mimaji. Nasikia kauliza mbona mnanipeleka baharini…jamaa yake akawahi kwa kusema hapana ni mvua tu zinaleta rabsha kidogo. Noma kweli aisee. 

Ile bwana issue ya Lwakatare bwana wanaijua wenyewe. Kuna wanaosema ile video ya kutengenezwa. Mimi siamini bwana. Mbona mwenyewe kabisa anaonekana anaongea? Kuna kitu bwana…na siku hizi hapa nchini kuna kesi za kubambikiana sana. Mtu hakupendi tu anakupa msala. 

Na kwa sababu ya njaa na rushwa zetu basi unaweza kuta unaozea Segerea. Nasikia Kajala kaponyeka na kifungo. Eee alipigwa mvua 7 ila Wema Sepetu kamuokoa kwa kumlipia faini ya Milioni 13 cash. Kumbe Wema ana Wema kweli na hela anayo. Hivi anafanya kazi gani? Si muigizaji, kwani hujui? Ina maana uigizaji unalipa eenh. 

Wee bwana wee…mambo ya mjini mtu wangu. Hivi unadhani hawa matajiri wote unaowajua wewe wanapata hela zao kutokana na kazi hizo hizo unazojua wanazifanya? Ushaambiwa mjini mipango…shauri yako. Sasa mumewe imekuwaje? Mume wa nani? Wa Kajala. Ah jamaa alikuwa na ngoma nzito zaidi. Kaenda ndani sijui miaka mingapi. Aliambiwa alipe faini ya Milioni 200. Thubutu. 

Mimi ndio maana huwa sipendi mipango ya mjini. Jamaa waliokuwa wanakula naye bata alipokuwa akitakatisha mambo hamna hata mmoja aliyethubutu. Lakini yote maisha, atasota jela akitoka Life goes on. Sasa awe nazo hizo hela alizokuwa ametakatisha. Lakini wale TAKUKURU nao…wanataka kuniambia watu wanaofanya michezo hiyo ni wachache kiasi hiki hapa nchini? Au ni kwa sababu…njoo nikunong’oneze taratibu… 

Nasikia kina Zitto wamemaliza mafunzo ya JKT…Ah mafunzo wapi bwana.Mafunzo gani wiki 3. Enzi zetu ulikuwa unatumbukia kule mwaka aisee.We acha tu. Mimi nilitupwa Mwaitende huko Mbeya. Lakini lazima jamaa tuwape sifa yao ya kuamsha hisia za uzalendo. 

Unajua kama kuna kitu JKT ilikuwa inasaidia lilikuwa ni suala la uzalendo. Na kumbuka enzi hizo bwana ilikuwa ukiimba wimbo wa taifa unausikilizia kweli kweli. Siku hizi vijana hawajui hata beti mbili za mwanzo. Ila nasikia kuna Mbunge alichemsha akaondoka…ni kweli? Eeh si yule Mbunge wa nanihii..wapi pale…ah nasahau. Ngoja ntakumbuka…Fanya mchezo na jeshi nini wewe. Unaweza toka mita. 

Humuoni Zitto kwenye picha nimeziona kwenye blog amesinzia kabisa kwenye gwaride.Uchovu ule. Simba kapigwa tena bwana. Kweli Simba mwaka huu sio. Ila wale Kagera bwana wakicheza kwao wabishi sana. Hata Yanga alikaa pale ujue. Ila hii migogoro bwana inaumiza sana klabu. Sio mgogoro tu…huyu Rage naye maneno mengi tu na kujua kanuni lakini soka haelewi kabisa. 

Halafu hizi habari za Mbunge kuwa Mwenyekiti wa timu…atafanya mangapi bwana. Huyu jamaa Mbunge wa Tabora. Simba watoto wa Msimbazi.Wapi na wapi. “Baba chakula tayari, Mama anasema”…Ee bwana washkaji eeh…baadae…. Jeff Msangi ni mwendeshaji wa mtandao wa www.bongocelebrity.com Unaweza kuwasiliana naye kwa kutumia Barua Pepe; bongocelebrity at gmail dot com.