Utulivu, Usalama, na Ukarimu wa Watanzania Wazidi Kuwavutia Watalii

* Watalii Wamiminika Ngorongoro na Serengeti

Mwandishi Wetu

Hali ya utalii nchini Tanzania yazidi kupaa kwa kasi, huku wageni kutoka pembe mbalimbali za dunia wakiendelea kumiminika kwa wingi kuja kushuhudia maajabu ya nchi inayoongoza kwa vivutio barani Afrika.

Katika lango kuu la kuingia Hifadhi ya Ngorongoro na katika geti la Naabi linaloelekea Serengeti, taswira inayojitokeza ni ile ile, misururu ya magari ya watalii, kamera zikitayarishwa, nyuso zenye tabasamu na shauku ya kuthibitisha ndoto zao katika vivutio vya Tanzania.

Kwa wengi wao, hii ndio mara ya kwanza kukanyaga ardhi hii yenye mandhari adimu kutoka kreta ya Ngorongoro moja ya maajabu ya dunia hadi Serengeti ambako uhamaji wa nyumbu umeandika historia isiyo na mfano duniani.

Lakini si vivutio pekee vinavyowashangaza. Watalii wengi wanasema wanavutwa zaidi na hali ya utulivu, usalama, na ukarimu wa Watanzania, mambo yanayowapa uhuru wa kutembea, kupumzika, na kufurahia safari zao bila hofu.

Hali hii ya kuongezeka kwa idadi ya wageni inaendelea kuithibitisha Tanzania kama moja ya nchi bora kabisa kwa utalii, mahali pa kipekee penye usalama na urafiki unaogusa mioyo ya wasafiri.

Tanzania inazidi kujijengea heshima kimataifa kama kimbilio salama, tulivu, na linalostahili kuwekwa kwenye orodha ya kila msafiri anayetafuta uzuri wa asili na uzoefu usiosahaulika.