WAZIRI KOMBO AWAKARIBISHA WAWEKEZAJI WA JAPAN

Waziri wa Mambo ya Nje na Ushirikiano wa Afrika Mashariki, Mhe. Mahmoud Thabit Kombo amewakaribisha wawekezaji wa Japan kuja Tanzania kufanya uwekezaji mkubwa kupitia mfumo wa Ushirikiano wa Sekta Binafsi na Umma (PPP) katika sekta za kilimo, uzalishaji, madini, uunganishaji wa vifaa na miundombinu ikiwemo miradi mikubwa ya uendelezaji wa bandari ya Dar es Salaam na reli ya kisasa (SGR) awamu ya sita na saba.

Mheshimiwa Balozi Kombo ametoa mwaliko huo Agosti 21, 2025 nchini Japan alipokutana na kuzungumza na Shirikisho la kampuni za wawekezaji wa miundombinu la Japan (JAIDA) ambalo linajumuisha takriban kampuni 190 na Wenyeviti wenza wa Kamati ya Afrika ya Shirikisho la wawekezaji la KEINDAREN ambalo linajumuisha takriban kampuni 1,500.

Katika mazungumzo yake na wawekezaji hao, Mheshimiwa Waziri Kombo amesisitizia nia ya Tanzania ya kutumia ushirikiano wa Tanzania na Japan katika sekta za kimkakati kama alama kuu ya ushirikiano wa Japan na Afrika.

Vilevile, amesisitizia umuhimu wa kuongeza ushirikiano wa Tanzania na Japan katika kuendeleza rasilimali watu ya Tanzania na kubadilishana ujuzi, uzoefu na teknolojia katika sekta mbalimbali za miundombinu, uzalishaji, viwanda na kilimo.

Kwa upande wa wawekezaji wa Japan wameahidi kutumia fursa hiyo na kuimarisha ushirikiano na Tanzania katika uwekezaji na biashara kwa maslahi mapana ya pande zote mbili kupitia miradi ya PPP.