Urasimishaji wa VAT kwa Njia ya Kidijitali Waweza Kuwezesha Biashara – TCCIA

 

Afisa TEHAMA wa Chemba ya Biashara, Viwanda na Kilimo Tanzania (TCCIA), Bw. Florian Mihyo (kushoto), akichangia katika mjadala wa jopo wakati wa Semina ya Ngazi ya Juu kuhusu Urasimishaji wa Kodi ya Ongezeko la Thamani (VAT) kwa njia ya kidijitali, iliyoandaliwa na Benki ya Maendeleo ya Afrika (AfDB) jijini Nairobi, Kenya jana. Kulia ni Bi. Hestia Irangabiye, Afisa TEHAMA kutoka Chemba ya Biashara ya Rwanda.

Mkaguzi wa Ndani wa Chemba ya Biashara, Viwanda na Kilimo Tanzania (TCCIA), Bw. Ronnie Mwaipasi (katikati), akizungumza katika mjadala wa jopo kwenye Semina ya Ngazi ya Juu kuhusu Urasimishaji wa Kodi ya Ongezeko la Thamani (VAT) kwa njia ya kidijitali, iliyoandaliwa na Benki ya Maendeleo ya Afrika (AfDB) jijini Nairobi, Kenya jana. Kushoto ni Bi. Hestia Irangabiye, Afisa TEHAMA kutoka Chemba ya Biashara ya Rwanda, na kulia ni Bw. Kayalu Gabre-Selassie kutoka Benki ya Maendeleo ya Afrika.

Na Mwandishi Wetu – Nairobi

CHEMBA ya Biashara, Viwanda na Kilimo Tanzania (TCCIA) imesisitiza umuhimu wa kutumia mifumo ya kidijitali ya VAT katika usimamizi wa kodi barani Afrika.

Akizungumza katika majadiliano ya jopo kwenye Semina ya Ngazi ya Juu kuhusu Urasimishaji wa VAT kwa njia ya Kidijitali iliyoandaliwa na Benki ya Maendeleo ya Afrika (AfDB) jijini Nairobi, Kenya, Bw. Ronnie Mwaipasi, Mkaguzi wa Ndani wa TCCIA, alisema kuwa urasimishaji wa VAT kwa njia ya kidijitali una nafasi muhimu katika kuwezesha biashara.

“Kidijitali si tu mabadiliko ya kiteknolojia, bali ni kichocheo cha ujumuishaji wa kifedha na mabadiliko ya kiuchumi. Kukumbatia mifumo ya kidijitali ya VAT kutarahisisha taratibu, kuongeza uwazi, na kuwezesha biashara kote barani,” alisema Bw. Mwaipasi.

Aliongeza kuwa, “Ukaguzi wa ndani ulio bora ni msingi wa mazingira imara ya kibiashara. Katika TCCIA, tumejikita katika kuimarisha uwazi, utii wa sheria, na ukuaji wa kimkakati kwa wanachama wetu.”

Akizungumzia ushiriki wa TCCIA kwenye semina hiyo, Afisa TEHAMA wa TCCIA, Bw. Florian Mihyo, alisema: “Ushiriki wetu kwenye semina hii umeongeza uelewa juu ya nafasi muhimu ya miundombinu ya kidijitali katika kurahisisha biashara. Kama Afisa TEHAMA wa TCCIA, naona kuna manufaa makubwa katika kuoanisha mifumo ya VAT na majukwaa kama Cheti cha Asili kwa njia ya kielektroniki (eCoO) tunalotoa.”

Aliongeza kuwa, “Ulinganifu huu hausaidii tu kufanikisha utii wa sheria bali pia unarahisisha taratibu kwa wauzaji nje na kupunguza muda wa kushughulikia mizigo, jambo muhimu katika kufungua fursa za biashara ya ndani ya Afrika chini ya mkataba wa AfCFTA.”

Semina hiyo iliyobeba kaulimbiu isemayo: “Utii wa VAT Usio na Vikwazo: Kuunganisha Mifumo ya Umma na Binafsi, Kuunganisha Mafanikio”, iliwakutanisha wadau wakuu kutoka Kenya, Tanzania, Uganda, Rwanda na Sudan Kusini wakiwemo maafisa wa kodi wa serikali, chemba za biashara, na wauzaji huru wa programu za kompyuta.

Ushiriki wa TCCIA katika semina hii ya VAT iliyoratibiwa na AfDB unaonyesha dhamira ya chemba hiyo katika kusukuma mbele ajenda ya kidijitali katika sekta ya biashara – ajenda ambayo pia imepewa kipaumbele na Serikali.

Semina hiyo pia ilichambua mwelekeo wa dunia katika urasimishaji wa usimamizi wa kodi kwa njia ya kidijitali na athari zake kwa uchumi wa Afrika, huku mkazo mkubwa ukiwekwa kwenye kodi ya VAT. Pia ilikuwa jukwaa la kubadilishana uzoefu na masomo kutoka kwa nchi za Afrika Mashariki.