SUA YAWAKUTANISHA MAAFISA WAANDAMIZI WA MAZINGIRA KUTOKA NCHI 10 ZA AFRIKA KUPITIA MRADI WA EFLOWS

 

 

Imebainishwa kuwa kuna umuhimu mkubwa wa kuwajengea uwezo watunga sera

hasa Makatibu Wakuu na Wabunge kuhusu athari za matumizi mabaya ya ardhi

katika maeneo ya vyanzo vya maji, Mito na kandokando ya Bahari ili kuwa na

uelewa wa pamoja wa athari hizo na mna ya kukabiliana nazo kwa manufaa ya

Taifa na vizazi vijavyo.

Wito huo umetolewa na Makamu Mkuu wa Chuo Kikuu cha Sokoine cha Kilimo

Prof. Raphael Chibunda wakati akifungua mafunzo ya siku saba kwa viongozi

waandamizi wanaosimamia masuala ya maji na mazingira kutoka nchi 10 za Afrika

zilizo kwenye ukanda wa Magharibi mwa Bahari ya Hindi yanayofanyika Jijini

Mbeya kupitia mradi wa Utafiti wa Usimamizi Endelevu wa Madakio ya Maji

Kupitia Tathmini ya Kuimarisha Mtiririko wa Maji kwa Mazingira na Utekelezaji

wake katika Kulinda Ukanda wa Magharibi mwa Bahari ya Hindi na Athari za

Shughuli za Kibinadamu Tanzania (EFLOWS).

“Pamoja na kazi kubwa ambayo nyinyi kama wataalamu mnaifanya mwisho wa

siku mtaandaa tarifa nzuri na kuwapelekea watunga sera ili waifanyie kazi, Lakini

bila wao kuelewa vizuri kwa kina mnayoandika baada ya kufanya tafiti mtajikuta

taarifa zenu mnazowaandikia hazifanyiwi kazi kama mnavyotegemea hivyo kuna

umuhimu mkubwa sana wa kujengeana uwezo nyinyi lakini pia kuwajengea

uwezo pia watunga sera maana ndio mnaowategemea katika kutelekeza yale

mnayowaplekea” Alifafanua Prof. Chibunda.

Amesema kuwa kuna tafiti nyingi sana zinafanyika kwenye nchi mbalimbali na

hata Tanzania ambazo zinalenga kutatua changamoto fulani lakini matokeo yake

hayaonekani moja kwa moja kwa jamii na Taifa kwakuwa wale wanaotegemewa

kuchukua matokeo hayo na kuyatumia pengine hawayatumii kwakuwa hawana

uelewa wa kina na wakutosha kuhusu yale ambayo tafiti zimebainisha.

Amepongeza kazi kubwa iliyofanywa na Watafiti kutoka SUA kwa kushirikiana na

Baraza la Taifa la Hifadhi ya mazingira NEMC katika utekelezaji wa Mradi wa

Tathimini ya maji kwa mazingira ambao matokeo yake mazuri ndio yamepekekea

Wataalamu hao kutoka nchi zote washiriki kuleta wataalamu wao kuja kujifunza

na kupanga mikakati ya pamoja na kukabiliana na changamoto hizo za

kimazingira.

Awali akieleza malengo ya mafunzo hayo Mtafiti Mkuu wa Mradi wa EFLOWS

ambaye pia ni Mkurugenzi wa Shahada za Uzamili, Utafiti, Uhauwilishaji wa

teknolojia na Ushauri wa Kitaalamu kutoka SUA Prof. Japhet Kashaigili amesema

utaalamu huo wa Tathimini ya maji kwa mazingira ambao umejengwa kupitia

mradi huo imeonekana ni muhimu sasa kuweza kuusambaza kwa wataalamu

kwenye nchi hizo ili kuwa na uelewa wa pamoja wa kukabiliana na changamoto

hizo za kimazingira.

“Mradi wa EFLOWS ambao tumeufanya kwa miaka miwili Wilayani Mbarali

Mkoani Mbeya na Wanging’ombe Mkoani Njombe ulikuwa mradi wa mfano

kuangali mtiririko wa maji na hali ya mto Mbarali matokeo yake yalilenga kupata

elimu ambayo itatumiwa na nchi zingine 10 za afrika, hivyo baada ya kukamilika

kwake sasa tumewaita wataalamu waandamizi kutoka nchi hizo kuja Tanzania

tujifunze na kubadilishana uzoefu kutokana na matokeo tuliyoyapata na kisha

kuja na maazimio ya pamoja ya namna ya kulinda ukanda wa magharibi mwa

Bahari ya Hindi kupitia mito na vyanzo vyake” alifafanua Prof. Kashaigili.

Aidha amesema kuwa changamoto nyingi za kimazingira zinazoonekana sasa

duniani ni matokeo ya shughuli za kibindamu ambazo zinagusa sekta mbalimbali

hivyo kutatua changamoto hizo ni lazima kuwe na jitihada za pamoja za kila mdau

kwenye sekta hizo na ndio maana wanawajengea uwezo kutambua na kuweka

mikakati ya pamoja ili kupata matokeo makubwa kwa wakati.

Kwa upande wake Wakili wa Serikali Mkuu kutoka ofisi ya Makamu wa Rais

Bwana Wankyo Mnono amesema mafunzo hayo ni muhimu kwa nchi zote

wanachama kwakuwa ulinzi wa Ikolojia ya Bahari ni muhimu kwa ustawi wa

viumbe na maisha ya watu maisha yao yanategemea rasilimali zinazopatikana

baharini.

“Tunatumia samaki na viumbe maji vingine kutoka Baharini na kwenye mito hivyo

swala la ulinzi wa ikolojia ya maisha ya samaki na viumbe vingine ni muhimu kwa

kuweka mipango na mikakati mizuri ya kuvilinda ili viendelee kutoa mchango kwa

jamii na taifa vizazi hadi vizazi lakini hilo litawezekana kama kutakuwa na

ushirikiano kwa nchi zote zilizo ukanda wa magharibi mwa bahari ya Hindi”

alieleza Bwana Wankyo.

Amesema kwa kutambua umuhimu wa kulinda Bahari na ikolojia yake Serikali ya

Tanzania inatarajia kutekeleza mradi mdogo wa utafiti utakaoangalia hali na

madhara ya matumizi ya mifuko na vifungashio vingine vya plastiki ili kupata

taarifa ambazo zitasaidia nchi kufanya maamuzi muhimu ya namna ya kukabiliana

na athari zinazotokana na matumzi ya plastiki kwenye bahari na nchi kavu.

Akitoa salamu kutoka Sekretarieti ya Azimio la Nairobi ambao ndio wafadhili wa

mradi huo Bwana Sammy Weru ameishukuru Serikali ya Tanzania na Chuo kikuu

cha Sokoine cha Kilimo kwa kuwezesha kufanyika kwa mafunzo hayo ya Kikanda

ambayo yana mchango mkubwa katika kulinda na kusimamia ukanda huo wa

bahari ya Hindi.

“Tunajisikia furaha kufanya kazi na SUA katika kutelekeza miradi mbalimbali

yenye tija kubwa kwa nchi zetu, na ninaamini kuwa kupitia mafunzo haya

tutatengeneza miongozo ya namna kusimamia masuala ya tathimini ya maji kwa

mazingira lakini bila kusahau kuzingatia dhana ya “kutoka Chanzo hadi baharini”

katika kuhakikisha usalama wa viumbe maji na ikolojia zao” alieleza Bwana Weru.

Mradi wa Utafiti wa Usimamizi Endelevu wa Madakio ya Maji Kupitia Tathmini ya

Kuimarisha Mtiririko wa Maji kwa Mazingira na Utekelezaji wake katika Kulinda

Ukanda wa Magharibi mwa Bahari ya Hindi na Athari za Shughuli za Kibinadamu

Tanzania (EFLOWS) unatekelezwa na Chuo Kikuu cha Sokoine cha Kilimo kwa

kushirikiana na Baraza la Taifa la hifadhi ya mazingira NEMC na wad au wengine

kwa ufadhili wa Sekretarieti ya Azimio la Nairobi.

Makamu Mkuu wa Chuo Kikuu cha Sokoine cha Kilimo Prof. Raphael

Chibunda wakati akifungua mafunzo hayo jijini Mbeya.

Mtafiti Mkuu wa Mradi wa EFLOWS ambaye pia ni Mkurugenzi wa Shahada

za Uzamili, Utafiti, Uhauwilishaji wa teknolojia na Ushauri wa Kitaalamu

kutoka SUA Prof. Japhet Kashaigili akieleza malengo ya Mafunzo hayo yakimataifa.

Wakili wa Serikali Mkuu kutoka ofisi ya Makamu wa Rais Bwana Wankyo

Mnono akitoa salamu za Ofisi ya Makamu wa Raisi.

Muwakilishi wa Sekretarieti ya Azimio la Nairobi ambao ndio wafadhili wa

mradi huo Bwana Sammy Weru akitoa salamu kwa washiriki.

Prof. Denis Juizo Mkuu wa Kitivo cha Uhandisi kutoka Chuo Kikuu chaEduardo Mondlane cha Msumbiji akitoa neno la shukrani.

Picha ya Pamoja ya baadhi ya washiriki wa Mafunzo hayo pamoja na mgeni

rasmi Prof. Raphael Chibunda.

Picha za washiriki wa mafunzo hayo kutoka nchi kumi za

afrika wakifuatilia mafunzo.