FIFA KUPIGA KURA YA KUONGEZA NCHI KWENYE MICHUANO YA KOMBE LA DUNIA LEO

Rais wa shirikishola Soka Duniani 'Fifa'  

Gianni Infantino

Shirikisho la Soka Duniani Fifa linatarajiwa kupiga kura leo kuamua kuhusu mpango wa kupanua Kombe la Dunia liwe linashirikisha mataifa 48. Mpango huo ukiidhinishwa, basi utaanza kutekelezwa Kombe la Dunia la 2026, na utakuwa na faida kwa nchi za Afrika na Asia.

Rais wa shirikisho hilo Gianni Infantino amekuwa akipiga debe mpango huo na amekuwa na uungwaji mkono mkubwa, pia anataka michuano hiyo iwe na makundi 16 ya mataifa matatu kila kundi na klabu mbili kutoka kila kundi zitafuzu kwa hatua ya mtoano na iwapo mpango huo utaidhinishwa, basi itakuwa mara ya kwanza kwa Kombe la Dunia kupanuliwa tangu mwaka 1998..

Kuna mapendekezo matano ambayo baraza kuu la Fifa lenye wanachama 37 litaangazia ikiwemo timu 48 na zikiwa kwenye makundi 16 na timu tatu kila kundi ambapo timu mbili bora zitasonga kwa hatua ya mtoano na kuingia timu 32 (mechi 80 kwa jumla).

Mapendekezo mengine ni kuwa na timu 40 na makundi 10 ya timu nne kila kundi ambapo mshindi, na timu sita pekee zinazomaliza nambari mbili kundini ndizo zinafuzu (mechi 76) nyingine ni kuwa na timu 40 na  makundi manane ya timu tano kila kundi (mechi 88) kusalia na kuendelea kusalia na timu 32 .

Infantino, 46, ambaye alimrithi raia mwenzake Sepp Blatter kama rais wa Fifa mwezi Februari 2016 alifanya kampeni akiahidi kupanua michuano hiyo. Awali alipendekeza michuano ya timu 40, wazo lililowasilishwa na rais wa wakati huo wa Uefa Michel Platini 2013, kabla ya kubadilisha msimamo na kuunga mkono michuano ya timu 48.

Chini ya mpango wa Infantino anaoupendekeza kwa sasa, mechi zinaongezeka kutoka 64 hadi 80, lakini fainali bado zinaweza kuchezwa kwa kipindi sawa na cha sasa cha siku 32. Taifa halitatakiwa kucheza zaidi ya mechi saba, sawa na ilivyo chini ya mpango wa sasa na dhaifu pekee ni kwamba huenda mikwaju ya penalti ikatakiwa kutenganisha klabu zinazotoka sare kwenye makundi.

Historia ya Mabadiliko Kombe la Dunia

Kombe la DuniaTimu

1930 Uruguay 13

1934 Italy 16

1950 Brazil 13

1954 Switzerland 16

1958 Sweden 16

1974 West Germany 16

1982 Spain 24

1986 Mexico 24

1998 France 32

Kwa msaada wa BBC.