MFUKO wa taifa wa bima ya afya (NHIF) utaanzisha huduma mpya itakayojulikana kama Mama na Mwana Afya Kadi ili kuboresha huduma za
bima ya afya kwa kundi hilo ambalo lipo katika uhitaji maalum.
Kauli hiyo imetolewa leo mjini Kilimanjaro na Kaimu Mkurugenzi Mkuu wa Mfuko huo, Bernard Konga alipokuwa akitoa salamu za Mfuko huo kwa wajumbe wa Baraza la Wafanyakazi la Mfuko linaloanza kikao chake mjini hapo.
Konga amesema lengo la huduma hiyo mpya ni kuwawezesha kina Mama
Wajawazito na Watoto kupata huduma za matibabu za uhakika zitolewazo
na mfuko wa taifa wa Bima ya afya.
Chimbuko la hatua hiyo linafuatia matokeo mazuri na mafanikio makubwa
ya mradi unaoendeshwa kwa pamoja kati ya NHIF na benki ya maendeleo ya
ujerumani ya KfW katika mikoa ya Tanga na Mbeya, hatua iliyofikiwa kwa
sasa ni kupata maoni ya wananchi kabla ya kuanza utekelezaji wake
katika mwaka wa fedha wa 2016/17.
Awali, akifungua kikao cha baraza hilo, mkuu wa wilaya ya Siha Dr
Charles Mlingwa, aliyemuwakilisha mkuu wa mkoa huo Meck Sadiki,
aliushukuru mfuko huo kwa kuwa wabunifu katika utoaji wa huduma kwa
makundi mbalimbali kwa kuzingatia uwezo wao wa kulipa. Ameutaka mfuko
huo kutafsiri hotuba za mheshimiwa Rais kuhusu dhana ya afya bora kwa
wote kwa kuweka mikakati katika eneo hilo.
Dr Mlingwa pia amesema wilaya ya Siha ni moja ya wilaya zilizofanikiwa
sana kuboresha huduma za matibabu ambapo kwa miaka miwili mfululizo
imeweza kupunguza sana vifo wa watoto wachanga na kufikia mtoto mmoja
kwa kila watoto laki moja.
Kaimu Mkurugenzi Mkuu wa Mfuko wa Taifa wa Bima ya Afya (NHIF), Bernard Konga, akizungumza wakati akitoa
salamu za Mfuko kwa wajumbe wa Baraza la Wafanyakazi la Mfuko huo lilikofanyika katika ukumbi
wa Katibu Tawala Mkoa wa Kilimanjaro.
Wajumbe wa Baraza la Wafanyakazi la Mfuko wa Taifa wa Bima
ya Afya (NHIF) wanaohudhuria.
Kaimu Mkurugenzi Mkuu wa Mfuko, Bernard Konga,(katikati)
akizungumza na baadhi ya wajumbe ndugu Gudluck Kirambe, kulia na
meneja wa mkoa wa Kilimanjaro ndugu Fidelis Stephen.
No comments:
Post a Comment