TAIFA GROUP YAGEUZA ZAWADI ZA MASHINDANO YA MBUZI KUWA FURSA YA ELIMU KWA WATOTO WENYE MAZINGIRA MAGUMU

 

KAMPUNI ya Taifa Group imekabidhi zawadi zote ilizoshinda katika Mashindano ya Mbuzi (Goat Races) yaliyofanyika Septemba 2026 kwa Klabu ya Rotary ya Dar es Salaam Oysterbay, kwa ajili ya kusaidia watoto na vijana wenye mazingira magumu nchini kupata fursa ya kuendelea na masomo ya elimu ya juu.

Uamuzi huo unalenga kugeuza ushindi uliopatikana kupitia burudani kuwa fursa ya kujenga maisha ya baadaye kwa watoto na vijana wa Kitanzania.

Hafla ya makabidhiano ya zawadi hizo imefanyika hivi karibuni jijini Dar es Salaam wakati wa mkutano wa kila wiki wa Klabu hiyo uliofanyika katika Kahawa Café, Masaki.

Zawadi hizo zilikabidhiwa na Deborah Kaluzi, Mtaalamu wa Masuala Endelevu kutoka Vodacom Tanzania, ambayo ilikuwa mdhamini mkuu wa Mashindano ya Mbuzi ya mwaka 2025. Kwa niaba ya Taifa Group, zawadi hizo zilipokelewa na Kemilembe Mugangala, Mkuu wa Chapa na Mawasiliano.

Hafla hiyo ilihudhuriwa na viongozi wa Klabu hiyo, akiwemo Paul Muhato, Rais wa Klabu ya Rotary ya Dar es Salaam Oysterbay; Benoit Ducarme, Makamu wa Rais; Rashida Nabulime, Rais Mteule; pamoja na Bhavesh Bhatt, mwanachama wa klabu hiyo.

Akizungumza baada ya kupokea zawadi hizo, Mugangala aliishukuru Vodacom Tanzania pamoja na Klabu ya Rotary kwa kuandaa jukwaa linalounganisha jamii, burudani na dhamira ya kusaidia wengine.

"Kwa niaba ya Taifa Group, tunajivunia sana kuwa sehemu ya jambo hili. Mashindano ya Mbuzi si utamaduni unaopendwa na wengi pekee, bali pia yanatukumbusha umuhimu na nguvu ya kurudisha kwa jamii," alisema.

Alisema kwa kuzingatia kaulimbiu ya Rotary isemayo Huduma Kabla ya Maslahi Binafsi (Service Above Self), Taifa Group imeamua kurejesha zawadi zote kwa jamii, akisisitiza kuwa hakuna mtoto anayepaswa kunyimwa fursa ya kupata elimu ya juu kutokana na mazingira aliyozaliwa au hali ya familia yake.

"Huko Taifa, hatufanyi biashara nchini Tanzania pekee, bali tunashiriki pia katika kujenga Tanzania. Ikiwa ushindi wetu unaweza kumsaidia mtoto mmoja kufikia ndoto yake ya kujiunga na chuo kikuu, basi huo ndio ushindi wa kweli," alisema.

Aidha, aliishukuru Vodacom Tanzania kwa kuwezesha jambo hilo na Rotary Oysterbay kwa kazi wanayoendelea kuifanya kwa manufaa ya jamii. Kwa upande wake, Paul Muhato, Rais wa Rotary Oysterbay, aliipongeza Taifa Group kwa uamuzi huo wa kurejesha zawadi kwa jamii, akibainisha kuwa fedha zitakazopatikana zitaelekezwa moja kwa moja katika mpango wa klabu wa kusaidia elimu nchini.

Mashindano ya kila mwaka ya Mbuzi, yanayodhaminiwa na Vodacom Tanzania, hukutanisha kampuni mbalimbali, familia na wadau wengine kwa lengo la kuchangisha fedha zitakazosaidia kufanikisha shughuli mbalimbali za kijamii na misaada ya kibinadamu katika maeneo tofauti nchini.